【狗狗嘔吐處理3步聚】
狗狗嘔吐點算好？比狗奴嘅簡易3步應急指南
見到主子嘔其實幾嚇人，甚至令人手足無措。無論係因為食得太快、散步時亂食野，定係輕微腸胃不適，最重要係識得冷靜應對，了解背後原因再決定下一步。
呢個簡單嘅3步指南會教你應該觀察啲咩、記錄啲咩，同埋幾時應該尋求獸醫協助。
狗狗點解會嘔（常見原因）
狗狗嘔有好多原因，唔一定係大病。一啲常見情況包括：
- 食得太快（狼吞虎嚥）
- 突然轉糧
- 偷食草或台底剩菜
- 輕微腸胃不適
- 暈車浪或太興奮
不過，嘔吐亦可以係嚴重問題嘅徵兆，所以細心觀察好重要。
第1步 — 回想嘔吐前發生咩事
試下回想主子嘔之前做緊咩：
- 係咪啱啱食飽？
- 係咪劇烈運動或玩緊？
- 有無翻過垃圾桶？
- 有無食過新零食？
- 有無異常行為，例如流口水或好攰？
呢啲線索可以幫你判斷嘔吐係咪同食物、活動或者誤食異物有關。
第2步 — 記錄嘔吐物形態
雖然有點噁心，但留意嘔吐物個樣真係好有幫助。你可以留意：
- 顏色： 黃色（黃膽水）、白色泡泡、未消化食物等
- 質地： 水狀、塊狀、泡沫狀
- 份量： 少少一撻 vs. 大量
- 氣味： 正常 vs. 異常惡臭
- 異物： 草、玩具碎片、包裝紙
如果在安全情況下，影張相比獸醫睇就最清楚。
第3步 — 觀察後續情況
狗狗嘔完之後，未來幾個鐘要密切留意：
- 佢精唔精神？舒唔舒服？
- 之後肯唔肯飲水食野？
- 嘔吐有無停止，定係繼續嘔？
- 有無其他症狀，例如肚痾或無力？
如果嘔吐變得頻密、狗狗睇落好唔舒服，或者症狀持續，就應該聯絡獸醫尋求指引。
支持狗狗腸胃健康
如果你想搵方法改善狗狗腸胃，Furry Green 提供以溫和、天然食材製作嘅慢煮鮮食，幫助毛孩消化更順暢。
瀏覽 Furry Green 鮮食減少嘔吐情況嘅簡單貼士
預防策略
- 保持定時定量、均衡嘅飲食
- 避免突然轉糧（要慢慢過渡）
- 收好垃圾桶，避免誤食危險物品
- 用慢食碗減慢進食速度
- 選擇對腸胃溫和嘅零食
- 將有毒物品放喺狗狗接觸唔到嘅地方
更多預防狗狗嘔吐嘅建議
- 🍽️ 保持均衡飲食： 餵食高質素、符合年齡需求嘅食物，避免經常轉口味。引入新食物時要循序漸進，預防腸胃不適。
- 🚫 避免餵人類食物： 好多人類食物（包括台底剩菜）都難以消化甚至對狗狗有害，容易引致嘔吐。盡量只餵專用零食。
- 🧸 遠離有毒物質： 確保家中嘅有毒植物、化學清潔劑等危險品收好，以免誤食中毒嘔吐。
- 🦴 提供安全潔齒骨或玩具： 俾合適嘅野佢咬，減少佢亂咬傢俬或吞食異物嘅機會。
- 🏃♀️ 飯後避免劇烈運動： 食飽之後最好休息至少一個鐘先好玩激列遊戲，以免因為胃部太脹而嘔吐（甚至胃扭轉）。
- 🗑️ 鎖好垃圾桶： 唔好俾機會佢做「垃圾專員」，以免食錯變壞食物或危險品。
- 📅 定期身體檢查： 定期帶主子見獸醫，可以及早發現潛在健康問題。
- 💉 準時打預防針： 確保疫苗接種齊全，預防可引致嚴重嘔吐嘅傳染病（如腸病毒）。
- 🧼 保持衛生： 定期清洗食具、水碗、床墊同玩具，減少細菌滋生同腸胃感染風險。
- 🍃 留意情緒壓力： 壓力或焦慮有時都會令狗狗嘔，留意有無野令佢緊張並加以舒緩。
總結
嘔吐雖然令人擔心，但只要冷靜觀察同應對，你就可以幫到主子。作為狗奴，你最清楚毛孩嘅狀況——如果有任何懷疑，相信你嘅直覺，直接問獸醫就最穩陣。
常見問題
點解狗狗食得太快會嘔？
當狗狗食得太急，會同時吞入大量空氣，導致嘔吐。另外，胃部一下子太飽都可能引起反流。使用慢食碗或益智餵食玩具可以強迫狗狗放慢進食速度，預防這個問題。
幾時要帶嘔吐嘅狗狗睇獸醫？
如果狗狗嘔吐頻密、睇落精神好差、嘔吐物有血、伴隨肚痾，或者超過12-24小時唔肯飲水食野，就應該聯絡獸醫。相信你嘅直覺——如果有懷疑，問專業意見永遠最好。
狗狗嘔吐物嘅顏色代表咩？
黃色液體通常係膽汁（黃膽水），多數因為空肚太耐。白色泡泡可能代表胃部受刺激或反流。如果有未消化食物，可能係食得太快。啡色可能係消化咗嘅血或食物。紅色代表有新鮮血液，要即刻求醫。記得影低嘔吐物比獸醫睇。
References
- eClinPath, Gastrointestinal Section – https://eclinpath.com
- WSAVA Nutritional Assessment Guidelines
- American Veterinary Medical Association (AVMA) Pet Owner Resources
- AAHA Nutritional Guidelines
你可能感興趣的文章：
狗狗嘔白泡點算好？狗狗嘔吐物顏色指南：幾時要擔心？